San Miguel de Lobios destaca por dous elementos singulares, a súa monumental torre do campanario e a cuberta do presbiterio. A robusta torre en posición central álzase avanzando da fachada, creando de tal maneira un espazo cuberto a modo de pórticosostido por fortes pilastras. A tipoloxía en alzado responde á empregada polos mestres canteiros de Terra de Montes, e á súa vez ó modelo de Domingo de Andrade, no primeiro terzo do s. XVlll, isto é, tres corpos decrecentes con elevado zócalo sobre o que se dispón unha potente balaustrada para o corpo das campás. Coróase con unha pequena cúpula sobre un tambor cego adornada con profusión de pináculos.
A capela maior actual edificouse en 1755 sendo abade Don Manuel de la Llana, segundo pode lerse na inscrición colocada na ábsida. Posiblemente por falta de recursos para cubri-la obra con unha bóveda de pedra optouse pola madeira o que propiciou unha obra orixinal . Así, solucionouse a cuberta con un octógono no que os paneis se pintaron dentro dun estilo popular en cores moi vivas, con representación de apóstolos, a Trinidade e a cruz co ceo estrelado no centro. Merece a pena destacar tamén as dúas fermosas portadas de entrada ó adro que culminan sendas escalinatas con pasamáns que salvan o desnivel co terreo circundante.
